عالم کی تقریر (نظم) ( ایس ایم مشرور کراچی 1951)

اپریل ۱۹۵۱ء

عالم کی تقریر

بہت دور بستی سے دریا کے پار            جہاں لوگ رہتے تھے جاہل گنوار

   گیا سیر کو ایک عالم وہاں                        نہ تعلیم کا اُس نے دیکھا نشاں

 نہ تھا اُس کو ہرگز یہ وہم و گماں              کہ ہیں سب کے سب لوگ جاہل یہاں

 ہوا دکھ اُسے کیونکہ انسان تھا                 وہ علم و ادب کا ثنا خوان تھا

 یہ سوچا کہ آیا تو ہوں میں یہاں                 کروں علم کے کچھ فوائد بیاں

 بلا کر یہ لوگوں کو اُس نے کہا                      بھٹکتے ہو کیوں اس طرح جا بجا

 یہ مانا کہ مفلس ہو، مزدور ہو                 حقیقت میں راحت سے تم دور ہو       

 ذرا دیکھودریا کو بہتا ہوا                        وہ بہتا ہے تم سے یہ کہتا ہوا

 اٹل ہوں اِرادے تو مشکل نہیں          مُسافر کو کچھ دور منزل نہیں

  بڑے لوگ دنیا میں    گزے ہیں جو         سدا پڑھنے لکھنے میں کوشاں تھے وہ

 یہ تقریر عالم کی جاری رہی                               فضا میں خموشی سی طاری رہی 

 جہالت کا اپنی اُنہیں رنج تھا                    وہاں ایک بوڑھے نے اٹھ کر کہا

 بلائیں گے بستی سے اُستاد ہم                 پڑھانے کی رکھیں گے بنیاد ہم

 وہاں الغرض مدرسہ کھل گیا                     ہر اک نوجواں پڑھنے لکھنے لگا

 کھلے جابجا شادمانی کے باغ                            نظر آئے ہر سمت روشن چراغ

 تھے غافل کبھی آج بیدار ہیں                     خرد مند ہیں اور سمجھ دار ہیں

ہے بے کار مسرور وہ زندگی

 نہ ہو جستجو جس میں تعلیم کی!

 ( ایس ایم مشرور کراچی)